ਕੀਮਤਾਂ ਵਿੱਚ ਇਸ ਕਮੀ ਦਾ ਅਸਰ ਹੁਣ ਬਾਜ਼ਾਰ ਵਿੱਚ ਵੀ ਦਿਖਾਈ ਦੇ ਰਿਹਾ ਹੈ। ਧਨਤੇਰਸ ਅਤੇ ਵਿਆਹਾਂ ਦੇ ਸੀਜ਼ਨ ਨੂੰ ਦੇਖਦਿਆਂ ਗਹਿਣਿਆਂ ਦੀਆਂ ਦੁਕਾਨਾਂ ‘ਤੇ ਗਾਹਕਾਂ ਦੀ ਆਮਦ ਵਧਣ ਲੱਗੀ ਹੈ। ਕਈ ਲੋਕ ਵਿਆਹਾਂ ਲਈ ਗਹਿਣਿਆਂ ਦੀ ਪਹਿਲਾਂ ਹੀ ਬੁਕਿੰਗ ਕਰਵਾ ਰਹੇ ਹਨ। ਸੋਨੇ ਦੇ ਨਾਲ-ਨਾਲ ਚਾਂਦੀ ਦੇ ਸਿੱਕਿਆਂ ਅਤੇ ਹੋਰ ਵਸਤੂਆਂ ਦੀ ਖਰੀਦਦਾਰੀ ਵਿੱਚ ਵੀ ਤੇਜ਼ੀ ਦੇਖਣ ਨੂੰ ਮਿਲ ਰਹੀ ਹੈ।

ਇੰਡੀਆ ਬੁਲੀਅਨ ਐਂਡ ਜਿਊਲਰਜ਼ ਐਸੋਸੀਏਸ਼ਨ ਦੇ ਰਾਸ਼ਟਰੀ ਸਕੱਤਰ ਸੁਰੇਂਦਰ ਮਹਿਤਾ ਮੁਤਾਬਕ ਇਸ ਸਾਲ ਧਨਤੇਰਸ ਮੌਕੇ ਸੋਨੇ ਦੀ ਵਿਕਰੀ ਪਿਛਲੇ ਸਾਲ ਦੇ ਮੁਕਾਬਲੇ 10 ਤੋਂ 12 ਫ਼ੀਸਦੀ ਵਧਣ ਦੀ ਉਮੀਦ ਹੈ। ਧਾਰਮਿਕ ਮਾਨਤਾਵਾਂ ਮੁਤਾਬਕ ਧਨਤੇਰਸ ‘ਤੇ ਸੋਨਾ-ਚਾਂਦੀ ਖਰੀਦਣਾ ਸ਼ੁਭ ਮੰਨਿਆ ਜਾਂਦਾ ਹੈ।

ਗਾਹਕਾਂ ਨੂੰ ਮਿਲ ਰਿਹਾ ਹੈ ਆਪਣੇ ਬਜਟ ਵਿੱਚ ਵਧੀਆ ਡਿਜ਼ਾਈਨ ਚੁਣਨ ਦਾ ਮੌਕਾ

ਜਿਊਲਰਾਂ ਦਾ ਕਹਿਣਾ ਹੈ ਕਿ ਕੀਮਤਾਂ ਘਟਣ ਕਾਰਨ ਉਹ ਗਾਹਕ ਵੀ ਮੁੜ ਬਾਜ਼ਾਰ ਵੱਲ ਆ ਰਹੇ ਹਨ, ਜਿਨ੍ਹਾਂ ਨੇ ਮਹਿੰਗੇ ਸੋਨੇ ਕਾਰਨ ਖਰੀਦਦਾਰੀ ਰੋਕ ਦਿੱਤੀ ਸੀ। ਕਲਿਆਣ ਜਿਊਲਰਜ਼ ਦੇ ਕਾਰਜਕਾਰੀ ਨਿਰਦੇਸ਼ਕ ਰਮੇਸ਼ ਕਲਿਆਣਰਮਨ ਅਨੁਸਾਰ ਹਫ਼ਤੇ ਦੇ ਅੰਤ ਵਿੱਚ ਸ਼ੋਅਰੂਮਾਂ ਵਿੱਚ ਗਾਹਕਾਂ ਦੀ ਗਿਣਤੀ ਵਧੀ ਹੈ ਅਤੇ ਸੋਨੇ ਦੀ ਵਿਕਰੀ ਵਿੱਚ ਵੀ ਚੰਗੀ ਰਫ਼ਤਾਰ ਦੇਖਣ ਨੂੰ ਮਿਲੀ ਹੈ।

Aura Jewels ਦੇ ਕਾਰਜਕਾਰੀ ਨਿਰਦੇਸ਼ਕ ਵਿਪੁਲ ਸ਼ਾਹ ਦਾ ਕਹਿਣਾ ਹੈ ਕਿ ਕੀਮਤਾਂ ਵਿੱਚ ਕਮੀ ਨਾਲ ਗਾਹਕਾਂ ਨੂੰ ਆਪਣੇ ਬਜਟ ਅੰਦਰ ਹੋਰ ਵਧੀਆ ਅਤੇ ਭਾਰੀ ਡਿਜ਼ਾਈਨ ਵਾਲੇ ਗਹਿਣੇ ਖਰੀਦਣ ਦਾ ਮੌਕਾ ਮਿਲ ਰਿਹਾ ਹੈ। ਖ਼ਾਸ ਕਰਕੇ ਵਿਆਹਾਂ ਨਾਲ ਜੁੜੀ ਖਰੀਦਦਾਰੀ ਆਉਣ ਵਾਲੇ ਦਿਨਾਂ ਵਿੱਚ ਸੋਨੇ ਦੀ ਮੰਗ ਨੂੰ ਹੋਰ ਵਧਾ ਸਕਦੀ ਹੈ।

ਹਾਲਾਂਕਿ ਸੋਨਾ ਅਜੇ ਵੀ ਪਿਛਲੇ ਸਾਲਾਂ ਦੇ ਮੁਕਾਬਲੇ ਮਹਿੰਗਾ ਹੈ। ਇਸੇ ਕਰਕੇ ਕਈ ਗਾਹਕ ਹਲਕੇ ਗਹਿਣਿਆਂ ਅਤੇ 18 ਕੈਰੇਟ ਸੋਨੇ ਨੂੰ ਤਰਜੀਹ ਦੇ ਰਹੇ ਹਨ। ਇਸ ਨਾਲ ਘੱਟ ਬਜਟ ਵਿੱਚ ਵੀ ਆਪਣੀ ਪਸੰਦ ਦੇ ਗਹਿਣੇ ਖਰੀਦਣੇ ਆਸਾਨ ਹੋ ਰਹੇ ਹਨ।

ਅੱਜ ਫਿਰ ਬਦਲੇ ਸੋਨੇ ਦੇ ਭਾਅ

ਸੋਨੇ ਦੀਆਂ ਕੀਮਤਾਂ ਵਿੱਚ ਉਤਰਾਅ-ਚੜ੍ਹਾਅ ਦਾ ਸਿਲਸਿਲਾ ਜਾਰੀ ਹੈ। MCX ‘ਤੇ ਸੋਨਾ 1,190 ਰੁਪਏ ਦੀ ਗਿਰਾਵਟ ਨਾਲ 1,38,996 ਰੁਪਏ ‘ਤੇ ਕਾਰੋਬਾਰ ਕਰਦਾ ਦੇਖਿਆ ਗਿਆ।

ਦੂਜੇ ਪਾਸੇ ਸਪਾਟ ਮਾਰਕੀਟ ਵਿੱਚ ਕੁਝ ਤੇਜ਼ੀ ਦਰਜ ਕੀਤੀ ਗਈ। ਗੁੱਡ ਰਿਟਰਨਜ਼ ਮੁਤਾਬਕ 24 ਕੈਰੇਟ ਸੋਨੇ ਦੀ ਕੀਮਤ 270 ਰੁਪਏ ਵਧ ਕੇ 1,39,640 ਰੁਪਏ ਹੋ ਗਈ। ਇਸੇ ਤਰ੍ਹਾਂ 22 ਕੈਰੇਟ ਸੋਨਾ 250 ਰੁਪਏ ਦੇ ਵਾਧੇ ਨਾਲ 1,28,000 ਰੁਪਏ ਅਤੇ 18 ਕੈਰੇਟ ਸੋਨਾ 200 ਰੁਪਏ ਵਧ ਕੇ 1,04,730 ਰੁਪਏ ‘ਤੇ ਪਹੁੰਚ ਗਿਆ।

ਸੋਨੇ ਦੀਆਂ ਕੀਮਤਾਂ ਵਿੱਚ ਆਈ ਇਸ ਗਿਰਾਵਟ ਨੇ ਧਨਤੇਰਸ ਤੋਂ ਪਹਿਲਾਂ ਗਾਹਕਾਂ ਨੂੰ ਖਰੀਦਦਾਰੀ ਦਾ ਚੰਗਾ ਮੌਕਾ ਦਿੱਤਾ ਹੈ। ਹੁਣ ਦੇਖਣਾ ਹੋਵੇਗਾ ਕਿ ਤਿਉਹਾਰ ਤੱਕ ਸੋਨੇ ਦੇ ਭਾਅ ਵਿੱਚ ਹੋਰ ਕਿੰਨਾ ਉਤਾਰ-ਚੜ੍ਹਾਅ ਆਉਂਦਾ ਹੈ।