45 ਦੇਸ਼ਾਂ ਦੇ ਕਰੀਬ 11 ਹਜ਼ਾਰ ਖਿਡਾਰੀ ਲੈਣਗੇ ਹਿੱਸਾ, 43 ਖੇਡਾਂ ਵਿੱਚ 469 ਸੋਨ ਤਗਮਿਆਂ ਲਈ ਹੋਵੇਗਾ ਮੁਕਾਬਲਾ

ਏਸ਼ੀਆ ਦੀ ਸਭ ਤੋਂ ਵੱਡੀ ਖੇਡ ਮਹਾਕੁੰਭ ਏਸ਼ੀਅਨ ਗੇਮਜ਼ 2026 ਦਾ ਅੱਜ ਜਪਾਨ ਦੇ ਨਾਗੋਆ ਸ਼ਹਿਰ ਵਿੱਚ ਰੰਗਾਰੰਗ ਅਤੇ ਸ਼ਾਨਦਾਰ ਉਦਘਾਟਨੀ ਸਮਾਰੋਹ ਨਾਲ ਆਗਾਜ਼ ਹੋ ਗਿਆ। ਜਪਾਨ ਨੇ ਇਸ ਮੌਕੇ ‘ਤੇ ਆਪਣੀ ਆਧੁਨਿਕ ਤਕਨੀਕੀ ਤਾਕਤ, ਉਦਯੋਗਿਕ ਵਿਕਾਸ ਅਤੇ ਸੱਭਿਆਚਾਰਕ ਵਿਰਸੇ ਦਾ ਵਿਲੱਖਣ ਪ੍ਰਦਰਸ਼ਨ ਕਰਦੇ ਹੋਏ ਦੁਨੀਆ ਭਰ ਦਾ ਧਿਆਨ ਆਪਣੇ ਵੱਲ ਖਿੱਚਿਆ।

ਅਗਲੇ 15 ਦਿਨਾਂ ਤੱਕ ਚੱਲਣ ਵਾਲੀਆਂ ਇਨ੍ਹਾਂ ਖੇਡਾਂ ਵਿੱਚ ਏਸ਼ੀਆ ਦੇ 45 ਦੇਸ਼ਾਂ ਦੇ ਕਰੀਬ 11,000 ਖਿਡਾਰੀ ਹਿੱਸਾ ਲੈਣਗੇ। ਖਿਡਾਰੀ 43 ਖੇਡਾਂ ਅਤੇ 71 ਉਪ-ਮੁਕਾਬਲਿਆਂ ਵਿੱਚ ਆਪਣਾ ਦਮਖਮ ਦਿਖਾਉਣਗੇ, ਜਦਕਿ ਕੁੱਲ 469 ਸੋਨ ਤਗਮਿਆਂ ਲਈ ਮੁਕਾਬਲਾ ਹੋਵੇਗਾ। ਖੇਡਾਂ ਦਾ ਸਮਾਪਤੀ ਸਮਾਰੋਹ 4 ਅਕਤੂਬਰ ਨੂੰ ਹੋਵੇਗਾ।

‘ਵਨ ਏਸ਼ੀਆ’ ਥੀਮ ਰਿਹਾ ਖਿੱਚ ਦਾ ਕੇਂਦਰ

‘ਹਾਰਮੋਨਿਕ ਹਾਰਟ ਬੀਟ’ ਥੀਮ ‘ਤੇ ਆਧਾਰਿਤ ਉਦਘਾਟਨੀ ਸਮਾਰੋਹ ਦੌਰਾਨ ਜਪਾਨ ਨੇ ਏਸ਼ੀਆਈ ਏਕਤਾ ਅਤੇ ਸਾਂਝੇ ਭਵਿੱਖ ਦਾ ਸੰਦੇਸ਼ ਦਿੱਤਾ। ਸਮਾਰੋਹ ਦਾ ਸਭ ਤੋਂ ਵੱਡਾ ਆਕਰਸ਼ਣ ਦਿਲ ਦੇ ਆਕਾਰ ਵਾਲਾ ਵਿਸ਼ਾਲ ਸਟੇਜ ਰਿਹਾ, ਜੋ ‘ਵਨ ਏਸ਼ੀਆ’ ਦੀ ਭਾਵਨਾ ਨੂੰ ਦਰਸਾ ਰਿਹਾ ਸੀ।

ਮਿਜ਼ੂਹੋ ਪਾਰਕ ਐਥਲੈਟਿਕ ਸਟੇਡੀਅਮ ਵਿੱਚ ਹੋਏ ਇਸ ਸਮਾਰੋਹ ਦੌਰਾਨ ਰਵਾਇਤੀ ਜਪਾਨੀ ਕਾਬੁਕੀ ਕਲਾ ਅਤੇ ਆਧੁਨਿਕ ਉਦਯੋਗਿਕ ਰੋਬੋਟਿਕ ਤਕਨੀਕ ਦਾ ਸ਼ਾਨਦਾਰ ਮੇਲ ਦੇਖਣ ਨੂੰ ਮਿਲਿਆ। ਹਜ਼ਾਰਾਂ ਦਰਸ਼ਕਾਂ ਦੀ ਮੌਜੂਦਗੀ ਵਿੱਚ ਹੋਏ ਇਸ ਦੋ ਘੰਟਿਆਂ ਦੇ ਪ੍ਰੋਗਰਾਮ ਨੇ ਖੇਡ ਪ੍ਰੇਮੀਆਂ ਨੂੰ ਮੋਹ ਲਿਆ।

ਜਪਾਨ ਦੇ ਸਮਰਾਟ ਨੇ ਕੀਤਾ ਖੇਡਾਂ ਦਾ ਐਲਾਨ

ਸਮਾਰੋਹ ਦੌਰਾਨ ਜਪਾਨ ਦੇ ਸਮਰਾਟ ਨਾਰੂਹਿਤੋ ਨੇ ਮਹਾਰਾਣੀ ਮਾਸਾਕੋ, ਓਲੰਪਿਕ ਕੌਂਸਲ ਆਫ ਏਸ਼ੀਆ ਦੇ ਪ੍ਰਧਾਨ ਸ਼ੇਖ ਜੋਆਨ ਬਿਨ ਹਮਦ ਅਲ ਥਾਨੀ ਅਤੇ ਅੰਤਰਰਾਸ਼ਟਰੀ ਓਲੰਪਿਕ ਕਮੇਟੀ ਦੀ ਪ੍ਰਧਾਨ ਕ੍ਰਿਸਟੀ ਕੋਵੈਂਟਰੀ ਦੀ ਮੌਜੂਦਗੀ ਵਿੱਚ 20ਵੀਆਂ ਏਸ਼ਿਆਈ ਖੇਡਾਂ ਦੇ ਅਧਿਕਾਰਤ ਆਗਾਜ਼ ਦਾ ਐਲਾਨ ਕੀਤਾ।

ਮਨੂ ਭਾਕਰ ਅਤੇ ਪਵਨ ਸਹਿਰਾਵਤ ਨੇ ਕੀਤੀ ਭਾਰਤੀ ਦਲ ਦੀ ਅਗਵਾਈ

ਐਥਲੀਟ ਪਰੇਡ ਦੌਰਾਨ ਭਾਰਤੀ ਦਲ ਨੇ ਵੀ ਖੂਬ ਧਿਆਨ ਖਿੱਚਿਆ। ਓਲੰਪਿਕ ਤਗਮਾ ਜੇਤੂ ਨਿਸ਼ਾਨੇਬਾਜ਼ ਮਨੂ ਭਾਕਰ ਅਤੇ ਕਬੱਡੀ ਸਟਾਰ ਪਵਨ ਸਹਿਰਾਵਤ ਨੇ ਭਾਰਤੀ ਦਲ ਦੀ ਅਗਵਾਈ ਕੀਤੀ।

ਦਰਅਸਲ, ਪਹਿਲਾਂ ਗੋਲਾ ਸੁੱਟ ਖਿਡਾਰੀ ਤਜਿੰਦਰਪਾਲ ਸਿੰਘ ਤੂਰ ਨੂੰ ਝੰਡਾਬਰਦਾਰ ਬਣਾਇਆ ਜਾਣਾ ਸੀ, ਪਰ ਸਮੇਂ ਸਿਰ ਰਸਮੀ ਕਿੱਟ ਨਾ ਮਿਲਣ ਕਾਰਨ ਇਹ ਜ਼ਿੰਮੇਵਾਰੀ ਪਵਨ ਸਹਿਰਾਵਤ ਨੂੰ ਸੌਂਪੀ ਗਈ।

ਲਗਭਗ 150 ਮੈਂਬਰੀ ਭਾਰਤੀ ਦਲ ਰਵਾਇਤੀ ਪਹਿਰਾਵੇ ਵਿੱਚ ਸਟੇਡੀਅਮ ਵਿੱਚ ਦਾਖ਼ਲ ਹੋਇਆ। ਮਨੂ ਭਾਕਰ ਗੂੜ੍ਹੀ ਨੀਲੀ ਸਾੜ੍ਹੀ ਅਤੇ ਰਵਾਇਤੀ ਜੈਕਟ ਵਿੱਚ ਨਜ਼ਰ ਆਈ, ਜਦਕਿ ਪੁਰਸ਼ ਖਿਡਾਰੀਆਂ ਨੇ ਗੂੜ੍ਹੇ ਨੀਲੇ ਰੰਗ ਦੀਆਂ ਬੰਦਗਲਾ ਜੈਕਟਾਂ ਪਹਿਨੀਆਂ ਹੋਈਆਂ ਸਨ।

ਏਸ਼ੀਅਨ ਗੇਮਜ਼ ਦੇ ਇਸ ਸ਼ਾਨਦਾਰ ਆਗਾਜ਼ ਨਾਲ ਹੁਣ ਖੇਡ ਪ੍ਰੇਮੀਆਂ ਦੀਆਂ ਨਜ਼ਰਾਂ ਅਗਲੇ 15 ਦਿਨਾਂ ਦੌਰਾਨ ਹੋਣ ਵਾਲੇ ਰੋਮਾਂਚਕ ਮੁਕਾਬਲਿਆਂ ਅਤੇ ਭਾਰਤੀ ਖਿਡਾਰੀਆਂ ਦੇ ਪ੍ਰਦਰਸ਼ਨ ‘ਤੇ ਟਿਕ ਗਈਆਂ ਹਨ।